19 декабрь көнне Миякәтамак төп гомуми белем бирү мәктәбендә “ФДББС шартларында татар теле һәм әдәбияты дәресләрендә инновацион технологияләр кулланып, ныклы белем һәм югары әхлак тәрбиясе бирү” темасына район семинары уздырылды. Татар теле һәм әдәбияты укытучысы Яппарова Регина Рим кызы укытучылар игътибарына 5 нче сыйныфта “А.Алиш – балалар язучысы. “Сертотмас үрдәк” әкияте “ темасына дәрес, 5, 8-9 нчы сыйныф укучылары белән “Әбиемнең күңел сандыгы” дип исемләнгән сыйныфтан тыш чара тәкъдим итте.
Семинарда катнашучы укытучылар тарафыннан дәрес инновацион алымнарга бай булуы, структурасы тулысынча ФДББС таләпләренә туры килгәне, һәр этабы балалар өчен кызыклы, мавыктыргыч эш төрләре белән үрелеп баруы, укучыларның фикер йөртү осталыклары һәм сөйләм телләре бай булуы билгеләнде. Әби-бабаларыбыздан калган, буыннан-буынга тапшырылган мирас, күңел байлыгы - ул дәвернең матурлыгын: милли бәйрәмнәрен, гореф-гадәтләрен, йолаларын ачык чагылдырган чарада укучыларның җыр-бию сәнгатенә, саф татар телендә сәнгатьле итеп халык авыз иҗаты әсәрләрен башкаруга, күз явын алырдай кул эшләренә оста булулары тагы да ямь өстәде. Ә сәхнәнең түрендә самавырлы, татар милли камыр ашлары белән тулы өстәл үзенә җәлеп итеп торды. Чигүле сөлге-ашъяулыклар, нәкышлы алъяпкычлар, пар мендәрле сәке, бизәлгән көянтә-чиләкләр, тукылган асалы паласлар, үз эченә күпме затлы, асыл хәзинә - кул эшләрен сыйдырган төп атрибут-әбекәйнең сандыгы да, балаларның милли киемдә булулары да күңелләрне шатландырып, чараны бизәлеш ягыннан зәвыклы икәнен күрсәтте.
Халкыбызның үткәненә, мәдәниятенә, туган теленә, туган җиренә ихтирам, горурлык хисе тәрбияләү, милләтебезне, телебезне саклау максатыннан оештырылган чара укытучының бетмәс-төкәнмәс иҗат дәрте белән яшәүче шәхес икәнлеген, тырыш, үз эшенең остасы булуын чагылдырды һәм семинарда катнашучы укытучылар тарафыннан югары бәяләнде.
 
Источник: http://mitamak.ucoz.ru |
